POESIAS

Prüma ediziun cumpleta da las poesias dad Andri Peer in Rumantsch. Il destin dal classic es quel dad esser fich cuntschaint e pac let. Andri Peer es ün classis. Amo plü asper es il destin dal "classic sainza text". Seis nom es cuntschaint, seis relasch es archivà, si'importanza litterara es atschertada, la qualità da si'ouvra para indiscutibla. Be l'ouvra manca, il plü important. Andri Peer ha edi si'ouvra poetica in bleras ediziuns fich variadas, dal quadernet ciclostilà bod commovent, a l'ediziun illas "Annalas", ad ediziuns tipograficamaing attractivas, hoz exaustas, oget da bibliofilia. Chi chi voul leger Andri Peer e's far ün'idea independenta da si'ouvra intera sto esser da sia generaziun, dad üna famiglia bibliofila o star dasper üna buna biblioteca. Per tschels e per tschellas e per evitar cha Peer resta ün "classis sainza text" vaina fat quist'ediziun chi nu voul esser be cumpletta e filologicamaing correcta, ma eir survisibla e dovrabla. I's tratta dad üna restampa da las principalas racoltas da poesia cha Andri Peer ha edì tanter il 1946 ed il 1985. Las racoltas sun restampadas in successiun cronologica, sainza las poesias tradüttas, ma cun tuot lur repetiziuns (detagls illa "Postfacziun"). La survista faciliteschan ün register cumplessiv ed ün register alfabetic da tuot las poesias chi registrescha eir las variantas. I sieuan ün purtret biografic da la duonna dal poet, Erica Peer, ün epilog academic ed ün pêr indicaziuns bibliograficas. L'ouvra poetica dad Andri Peer resta da scuvrir, na be per la scienza litterara, chi tilla vuol descriver e classifichar, eir e pustüt per üna lectüra chi tilla voul giodair.