Fototrucke, Vol. 2

Dra tänkt han i eigentlech scho lang, aber äbe, immer wider han is usegstüdelet, einisch dä Riisefotihuuffe gründlech usezmischte, wo mer my Vatter hinderla het. Mängs hundert Bilder syn es gsi, wo da scho sit Jahr u Tag versteckt u vergässe vor sech häre bbleichet hei. - «Hütt machen is», han i mer gseit, di Sache mal aagluegt u de afa sortiere.

Zmitts i dere Sortiererei isch mer undereinisch es brüüntscheligs, chlyses Bildli mit zaggeletem Rand i d Finger grate, won i scho mal gseh ha. Dä uf däm Helge syg i, het mer einisch e Tante erklärt. I has chuum chönne gloube: «Waas, das söll mi sy?», han i usgrüeft, «dä chly Pfüderi mit blonde Zapfelocke u Pumphose, wo usgseht wi nes Meitschi?». Das syg äbe früecher der Bruuch gsi, die chlyne Ching so aazlege, het si mer druuf erwideret. Un i ha tänkt, me hätt däm Büebu allwäg am liebschte no grad es Röckli aagleit.

Ab allem Verwyle bi däm Föteli sy myner Gedanke zrügg gwanderet i d Chin - derzyt.

Inhalt

Vo Zapfelocke, Schabziger u Deodorant / Ds Velo / Grand-Prix / Zügle / Aaträtte / Yrücke / Zu Befähl / Der Bueb